Petwokaribe : NOU PAP KONPLIS mande lakoudèkont pou li bay arè dèbè yo…

NOU PAP KONPLIS di lonè respè pou lajenès, laprès ak popilasyon ayisyèn nan ki pat janm bat ba pandan plis pase de (2) lane mobilizasyon pou mande kont sou gaspiyaj lajan petrocaribe a, malgre tout kalite entimidasyon ak represyon yo t ap sibi.

NPK yon lòt bò ap salye kouraj tout manm lakoudèkont yo ki rive pibliye nan dat 17 dawou 2020 an, dènye pati rapò odit sou depans leta ayisyen te fè nan lajan petrocaribe a. Yon nouvel ki make yon pa anplis nan batay kont koripsyon lajenès, laprès ak popilasyon an te angaje yo a. Rapò sila a montre aklè kijan moun ki t ap deside pou sosyete a tap piye, gagote lajan kite la pou fè devlopman anndan peyi a. Bravo lakontantman pou tout moun ki te angaje nan batay sa a ki pèmèt nou franchi yon etap enpòtan nan batay la.

Batay pou PWOSÈ PETWOKARIBE A fenk tanmen, n ap ankouraje popilasyon an pou l plis vijilan epi pou l plis angaje l, nou poko ka kriye viktwa toutan koudèkont  pa monte tribinal administratif ki pou tande sila kigen responsablite nan dezyèm nivo leta a, n ap kontinye fòse lakoudèkont rann arè debè ak kitis yo.

Nou pap konplis ap renouvle angajman l nan foule beton an pou wete somèy nan je tout jij lakoudèkont yo ki dwe travay prese prese sou arè debè yo,ak tout petwodilapitatè yo.

Nap pwofite okazyon sa pou n denonse konpòtman bèbè gouvènman MOISE JOUTHE la ki poko reyaji piblikman sou piblikasyon dènye pati rapò a, yon konpòtman nou jije iresponsab, sinik. Ki voye jete tout jefò ak sakrifis lajenès fè nan mande kont sou lajan nou yo volè.

Pou nou fini, n ap di lajenès ak tout popilasyon an PWOSÈ PETWOKARIBE a posib. Men pou sa rive fèt, nou dwe angaje nou pi plis. Se pral yon pwosè istorik, se ap yon siyal fò ki pral efreye tout moun ki panse leta se chwal papa.

. *Pwosè petwokaribe pagen zanmi!*

. *jistis ak reparasyon pou pèp la!*

. *Nou pap konplis!*

La Rédaction

La Rédaction
Contact : actualites@haitinews2000.com