BAAM : Gouvènman ak “CPT” a pa montre okenn siy yo sou rezoud kriz la

Pòtoprens, jedi 22 dawou 2024.-,Blòk k’ap Apiye Akò Montana a (BAAM) koube l byen ba pou salye pasyans ak kouraj pèp ayisyen an ki devlope yon rezistans san fay fas ak tout kalamite, ensekirite, kidnaping, peyi lòk y ap sipòte malgre yon konsèy Prezidansyèl ak yon gouvènman enstale depi plizyè mwa.

Nou sonje gouvènman anplas la te ba nou garanti yo pral rekipere chak kay, chak katye, chak komin ki pèdi, kòm rezilta kantite tèritwa pèdi yo ogmante.

Nou sonje Gouvènman an te pwomèt fòs etranje yo ap vini pou ede lapolis la goumen kont gang, reyalite a se lapolis ki sanble ap sekirize fòs la pandan gwoup gang yo vin pi konfyan kòmsi yo gen  garanti anyen p ap rive yo.

Plis pase yon mwa aprè eta ijans sekirite pran sou zòn metwopolitèn lan ak kèk vil pwovens, okenn operasyon pa fèt, okenn bilan pa bay e nou wè si gen yon gwoup ki gen bilan se gang yo.

Moun solino ap kouri chak jou anba bal bandi, yo boule kay yo. Malgre yo rele mande sekou, pèsonn nan leta a pa di yon mo. Pandansetan,  se eskandal kòripsyon nan tout nivo nan leta a e pèp la li menm ap naje pou kò l nan labou fatra, mizè ak ensekirite ki makònen ak yon dezespwa san parèy nan tout istwa peyi a.

Kanta Konsèy Prezidansyèl la, nou poko wè ni gen menm lenpresyon gen yon ti kal volonte pou rezoud pwoblèm yo.

Nan yon nòt BAAM te pibliye jou ki te 22 avril 2024 la, li te di popilasyon an va konnen si l pran nan mera depi sou kalte moun yo pral nome nan diferan nivo nan administrasyon piblik la; enben depi lè a, nou tande tout kalte koze k ap di sou pòs nan leta a, nou konstate dirijan yo pran dosye a pou jere koze klan, fè chantaj avè l epi trete avèk anpil mepri de gwoupman ki rasanble de sitwayen onèt ak konpetan  ki t ap batay pou rive tabli tranzisyon sa a avèk espwa sa ta pral chanje pou popilasyon an. Men, elas.

BAAM santi l revòlte lè l konstate se menm pratik yo ki kontinye ap fèt, BAAM blese lè l wè se menm sila yo ki mete Ayiti kote l ye a ki kontinye ap fè lalwa nan leta a pandan n ap pwofite di byen fò nou kanpe anfas tout pratik ki vize kontinye bay sistèm nan tete ak menm vye konpòtman politik ki se mak fabrik PHTK yo.

Li lè li tan pou diskou aktè politik yo avan yo nan pouvwa bobo ak zak y ap poze lè yo fin pran pouvwa. BAAM pare pou l kontinye denonse tout aktè k ap goumen pou kenbe sistèm lan jan l ye a pou satisfè enterè mesken ak ti gwoup yo pandan y ap meprize tout sa ki sanble ak mas popilè a.

Fwa sa a, BAAM di fòk se Ayiti ki priyorite tout moun k ap fè politik nan peyi a kòm dirijan. 

Pou  fini, modòd la pa chanje, BAAM mande:

1. Bon jan estrateji pou tabli sekirite nan tout peyi a prese prese ; 
2. Yon nouvo kad makroekonomik pou relanse ekonomi peyi a;
3. Yon Plan pou lite kont ensekirite alimantè ak Kriz imanitè nan peyi a;
4. Kreyasyon ògàn ki va la pou kontwole Tranzisyon an;
5. Yon konferans nasyonal pou tabli yon pak gouvènabilite ak yon plan devlopman pou peyi an  pou 50 lane k ap vini la yo ;
6. Amandman konstitisyon an; 
7. Eleksyon  pou retounen peyi a sou ray demokratik.

Pou komite a : 

Valéry COQUILLON,  Kòdonatè Jeneral ; 

Fred Alico DUROCHER,  Sekretè Jeneral ; 

Anel DORLEAN,  Responsab Relasyon Piblik ak Mobilizasyon  

Contact :+(509) 4461 8210/ 4726 9615/ 3632 3759

La Rédaction

La Rédaction
Contact : actualites@haitinews2000.com